Mahir Emreli döyüldüyü üçün Polşadan ayrılmaq istəyir

10:00 14-12-2021 2

Azərbaycan millisinin futbolçusu Mahir Emreli Polşanın “Legiya” klubundan ayrılmaq fikrinə düşüb.

milletinsesi.info xəbər verir ki, bu barədə Polşa mətbuatı məlumat yayıb.

Orada bildirilib ki, 24 yaşlı forvard klubun günahı ucbatından müqaviləni pozmaq şanslarının nə qədər olduğunu öyrənmək üçün hüquqşünaslarla əlaqə saxlayıb. Onu bu fikrə Plotsk “Visla”sı ilə matçdan sonra bazada azarkeşlər tərəfindən hücuma məruz qalmaları salıb.

Qarşıdurma nəticəsində döyülənlərdən biri olduğu deyilən Emrelinin müayinə üçün xəstəxanaya getdiyi və həkimlərin ona iki günlük istirahət tövsiyə etdiyi vurğulanıb. Yığmamızın aparıcı üzvünün “Zaqlembye”yə qarşı sabah keçiriləcək Polşa Ekstraklasasının III turundan təxirə salınan görüşündə iştirakının sual altında olduğu yazılıb.

Qeyd edək ki, yayda “Qarabağ”dan “Legiya”ya keçən Mahir Emreli Varşava təmsilçisi ilə 3+1 illik müqavilə imzalayıb.