Azərbaycan “Böyük Dəbilqə”də daha iki medal qazandı

00:15 07-11-2021 5

Heydər Əliyev adına İdman Sarayında keçirilən Bakı “Böyük dəbilqə” beynəlxalq turniri davam edir.

Yarışın ikinci günündə Azərbaycan cüdoçuları daha 2 medal qazanıblar.

Əvvəlcə Hidayət Heydərov bürünc medal görüşünə çıxıb. Yetmiş üç kiloqram çəkidə çıxış edən idmançımızın rəqibi almaniyalı Lukas Vennekold olub. Qarşılaşmanın əsas vaxtında hesab açılmayıb. Qızıl xal bölümündə vazari ilə qalib gələn Hidayət Heydərov 3-cü yeri tutub.

Səksən bir kiloqram çəki dərəcəsində mübarizə aparan Elcan Hacıyev də eyni uğuru təkrarlayaraq, bürünc medala sahib olub. Cüdoçumuz üçüncü yer uğrunda görüşdə komanda yoldaşı Hasil Cəfərovu məğlub edib.

Qeyd edək ki, hazırda Azərbaycan millisinin aktivində 1 qızıl, 1 gümüş və 3 bürünc medal var. Mötəbər yarışın ilk günü Orxan Səfərov (66 kq) qızıl, İçinxorlu Munxtsedev (57 kq) gümüş, Rövşən Əliyev (60 kq) isə bürünc medala sahib olub.